EB’ LI QANA’CHIN AJ K’AY SA’ B’E, TOJ WANK AJWI’ LI CH’A’JKILAL NAKE’RIL

Wan o'laju kutan tana risikileb' li qanachin nake' k'ayink sa' b'e sa’ xyi li tenamit a’in, anaqwan nak'e xjultika naq jwal maak'a' li k'ayink ut jwal xiwxiw li na'jej b'arwi' xe k'eemank li xna'aj, kiib’ reheb' li qanachin nake' xjultika naq maak’a’ k’ayink:

“Ninpatz’ re li alkalt naq tooxtenq’a, laa’in nintoj linkaxlan xam, linwarib’aal, nintoj linha’, maak’a’ ninnaali, lajeeb’ roxk’aal quetzal ajwi’ xinnaali ewer, ut arin jwal xiwxiw, nake’kub’e malaj nake’taqe’ chi jumpaat eb’ li b’eeleb’aal ch’iich’, mare tohex nume’k’am, ani tch’ik rib’ sa’ ch’a’jkilal a’an li alkalt xb’aan naq xooxkanab’ arin, kajwi’ naraj sik’aq li qana’aj b’ar tooxk’e”, chan jun li ixq.

“Xoowan chaq chitzuul nokok’ayink b’ayaq, ab’an naq xohe’xtaqla chaq arin taq’a maak’a’ chik naqak’ayi, naqaxuwaheb’ li b’eeleb’aal ch’iich’ rik’in li qakok’al”, chan chik jun li poyanam.

Usta jwal maak'a li nake' xkayi ab'an wan li esil naq te' jalmanq wichik junsutaq li xna'jeb' re li kayink ut a na’leb’ a’in ink’a jwal nake’ wulak chiru li qana’ chin. “wi tohe’risi wi’chik arin oon b’itaachik naqasik’ k’aru tqab’aanu re naq ink’a’ yooqeb’ xmuxb’al li qak’ulub, xootitz’’, malaa’o tab’i’ xul’”, chankeb’ li komon.

Re naq te' tuqub'amanq li xwanjikeb' ut maaka’aq chik li xiwxiw wank, qawa' Francisco Tot najalomink li k'ayib'aal naxye naq yo xk’a’uxl xb’aan naq li na’jej b’arwi’ xe’k’ehe’ jwal yib’iru.

Xye ajwi’ naq eb’ laj k’ay li wankeb’ sa’ li ochoch (centro comercial) ink’a’ nake’raj naq wanqeb’ li qanachin aran, ut naq xe’el chaq chitzuul a’aneb’ ajwi’ laj eechalre li nimla k’ay Qualimax, xe’xk’e jun jitok chirixeb’ jo’kan naq xe’el chaq aran, ab’an yooko sa’ ch’utam re rilb’al b’ar te’qak’e li komon ut maak’a’q li ch’ajkilal, chan qawa’ Tot.